GENSAN- Gitimbaya ni PCol. Nicomedes Olaivar Jr., City Director sa General Santos City Police Office(GSCPO) ang mga personahe ni Police Major Robert Fores, hepe ng Tinagacan Police Station kauban ang mga personahe sa Jose Abad Santos Municipal Police Station sa malampusong pagkasikop sa suspek nga mipatay sa usa ka trabahante sa fishpond nga si Bilmar Marcos Danieles sa Purok 5A Brgy.Katanggawan ning dakbayan.
Ang nadakpan mao si Darwin Dawang nga kasamtangang balhog sa Tinagacan Police Station.
Sumala ni Olaivar, milungtad og duha ka gabii ug tulo ka adlaw ang hot pursuit operation sa wala pa nadakpan ang suspek. Gikatakdang ipailawom usab kini sa drug test isip kabahin sa imbestigasyon.
Sa inisyal nga pag-imbestiga nasuta nga personal grudge ang motibo sa krimen.
Sa wala pa ang insidente, nasayran nga nagkauban pa ang suspek ug biktima nga nag-inom og ilimnong makahubog. Sa sunod adlaw, nakaplagan na lamang ang biktima nga patay na, adunay lalom nga samad sa liog ug naligo sa kaugalingong dugo.
