Nagpahimangno ang International Energy Agency nga anaa sa dakong hulga ang global nga ekonomiya tungod sa nagpadayon nga krisis sa enerhiya nga konektado sa tensyon sa Middle East, ilabina sa Strait of Hormuz.
Sumala kang International Energy Agency chief Fatih Birol, ang kahimtang karon matandi sa oil crisis sa 1970s ug sa epekto sa Russian invasion of Ukraine, nga gitawag niyang kombinasyon sa “two oil crises and one gas crash.”
Gipasabot niya nga walay nasod nga makalikay sa epekto kung magpadayon ang krisis, busa gikinahanglan ang lig-on nga global cooperation.
Samtang nagpadayon ang tensyon tali sa United States ug Iran, naapektuhan ang dagan sa suplay sa enerhiya sa maong lugar.
Ang Strait of Hormuz maoy agianan sa kapin 20% sa global nga lana ug gas shipments, ug tungod sa gubat, hinay ang suplay nga misangpot sa pagsaka sa presyo sa lana. Tungod niini, nagkadako ang kahadlok nga mosamot ang epekto sa ekonomiya sa tibuok kalibutan.
