Gihimakak sa Malacañang ang pamahayag ni Bise Presidente Sara Duterte nga ang tibuok katawhang Pilipino nasuko sa pag-aresto ug pagpadala kang kanhi Presidente Rodrigo Duterte sa The Hague, Netherlands aron atubangon ang International Criminal Court (ICC).
Sumala ni Communications Undersecretary Claire Castro, natural lang ang reaksyon sa bise presidente isip anak sa akusado.
Bisan pa, gipasiugda sa opisyal nga ang sentimento sa mga biktima sa extrajudicial killings o EJK, ingon man sa mga tigpasiugda sa tawhanong katungod, nga dugay nang nangayo og tulubagon, sukwahi niini.
Gipunting sa Palasyo nga ang lakang sa gobyerno usa ka direktang tubag sa mga Pilipino nga nagsang-at og mga reklamo sa ICC human gibati ang kakulang sa hustisya ubos sa miaging administrasyon.
Giingon usab ni Castro nga ang kasamtangang sitwasyon dili rason nga masuko ang mga indibidwal nga mga ilo ug biktima sa gubat batok sa droga.
Ang kanhi presidente nag-atubang og imbestigasyon sa ICC tungod sa pormal nga mga alegasyon sa mga krimen batok sa katawhan nga may kalabotan sa iyang kampanya batok sa ilegal nga droga sa dihang siya anaa sa pwesto.
Gipaniguro sa Malacañang nga ang pagpadala kang Duterte sa The Hague mao ang unang lakang aron masiguro ang patas nga husay.
Dili lang kini para sa mga biktima sa EJK, apan usa usab kini ka pormal nga oportunidad para sa kanhi presidente nga depensahan ang iyang kaugalingon sa hustong korte.
