Misaka na sa 107 katawo ang namatay sa mga pagbaha ug pagdahili sa yuta sa ‘Gamo Zone’, habagatan sa Ethiopia, sumala sa usa report gikan sa mga awtoridad. Samtang mukabat sa 128 katawo ang natala nga nawala.
Sumala sa South Ethiopia Regional State Police Commission, nakit-an ang mga patayng lawas ilalom sa lapok, samtang usa ra ka tawo ang naluwas nga buhi atol nagpadayon nga rescue operations. Dili pa klaro kung pila ka panimalay ang naapektuhan sa pagbaha.
Nagpadayag sa iyang pahasubo si Tilahun Kebede, presidente sa South Ethiopia Regional State ug nanawagan sa mga residente nga mag-amping.
Samtang, mas kaylap nga pagbaha ang miigo sa East Africa, ilabi na sa Kenya, diin kapin sa 42 ka tawo ang namatay sa pipila ka adlaw nga kusog nga pag-ulan.
