Gipanghimakak sa kampo ni Sandara Park ang akusasyon sa iyang kauban sa 2NE1 nga si Park Bom nga siya kuno naggamit og illegal nga droga, ug giingong walay basehan ang maong alegasyon.
Nagsugod ang isyu human mag-post si Bom sa Instagram kon asa deleted na karon, diin iyang gibutyag nga gihimo siyang ‘scapegoat’ aron tabuan ang giingong paggamit og droga ni Sandara, apan sumala sa tinubdan nga duol kang Sandara, wala’y kamatuoran ang maong pasangil ug nabalaka pa gani siya sa kahimtang sa panglawas ni Bom.
Dugang pa, gihangyo ni Bom ang iyang kauban nga si CL ug ang YG Entertainment nga dili siya i-report sa awtoridad may kalabotan sa paggamit og Adderall nga labaw sa gireseta.
Kahinumduman nga kaniadtong 2010, giakusaran si Bom og pagpasulod og 82 ka pills sa maong tambal nga istriktong ginakontrol sa South Korea tungod sa sulod niini nga amphetamine, apan naundang ang kaso human niyang ipasabot nga kini para sa iyang Attention Deficit Disorder.
Giapil usab ni Bom sa iyang pahayag ang mga ngalan nila Yang Hyun-suk ug Teddy Park samtang naghangyo sa publiko nga susihon pag-ayo ang kamatuoran, ug sa pagkakaron, si Bom nagpabilin sa indefinite hiatus tungod sa iyang kahimtang sa panglawas samtang ang grupo nga 2NE1 nailhan isip usa sa mga bantugang K-Pop girl group sa ilang panahon.
