GENSAN – Nakatutok ang kapulisan sa motibo nga personal grudge sa ilang padayong pag-imbestiga sa pagpamusil patay sa traysikol driver diin nadamay pa ang usa ka nurse sa maong insidente sa Aparente St. Barangay City Heights, Gensan kaniadtong Lunes human nga nakabsan sa kinabuhi.
Matud ni Police Major Ivan Charles Abastillas, Station commander sa San Isidro Police Station, ang biktima nga si Iven Miano Conde, 33 anyos, residente sa Lower Nopol Klinan 5 Brgy. Mabuhay Gensan ang may kasong rape nga gipasaka kaniadtong 2023 og gitugotan sa korte nga makapiyansa.
Gibutyag sa opisyal nagatambong sa gihapon ang biktima sa mga hearing nga ulahi nahitabo sa miaging bulan.
Sa pamahayag ni Abastillas nga ang giatubang nga kaso ni Conde ang gitan-aw karon nga konektado sa krimen. Hinuon, wala gilimitahan ang pagpangita og dugang ebidensya sa pagtumbok sa laing motibo.
Kahibaluan, nadamay sa pagpamusil ang nurse sa usa ka ospital sa GenSan nga si Nhiezer Rolliene Jane U. Aguacito, nga taga Oringo Subd. Brgy. City Heights.
Ang nasampit igo lamang unta nipalit og mga sabon sa usa ka mall og sa pag-uli niya, ang iyang nasakyan nga traysikol mao ang gimanehoan usab sa biktima nga si Conde.
