GENSAN- Gihingusgan ni PBGen. Arnold Ardiente, regional director sa Police Regional Office 12 (PRO-12), nga tungod sa hugot nga kampanya batok sa illegal nga droga, kapin sa ₱90.17 milyones ang kantidad sa mga droga nga ilang nakumpiska sa miaging tuig.
Sumala sa annual report sa PRO-12, ₱85.9 milyones niini ang kantidad sa shabu nga mukabat og 12.6 ka kilo, samtang kapin sa ₱4 milyones ang kantidad sa marihuana, nga nakab-ot pinaagi sa 469 ka operasyon nga miresulta sa 1,648 ka mga naaresto.
Matod pa ni Gen. Ardiente, bisan pa sa kadaghan sa nadakpan, nagpadayon ang iyang mando sa tanang PNP personnel nga mas pahugtan pa ang kampanya batok sa illegal nga droga aron hingpit nga makontrola ang problema, ilabi na ang pagpadala sa ilegal nga droga pinaagi sa mga parcel nga kasagaran nagagikan sa Luzon.
