GENSAN- Posibleng selos sa negosyo ang usa sa mga motibo nga ginatan-aw sa kapulisan sa pagpamusil patay sa usa ka negosyante sa Zone 1, Purok Balunto, Barangay Labangal, ning dakbayan kagabie.
Giila ang biktima nga si Allan Sayas Granada Jr., 38 anyos, residente sa maong lugar. Matud ni PCol. Nicomedes Olaivar Jr. labaw sa kapulisan sa GenSan nga aduna na silay person of interest nga posible nipusil patay sa biktima.
Gikadugang pa sa nasampit nga opisyal nga adunay nakita nga lima ka basiyo sa caliber 45 nga pusil.
Kini misibo sa pamahayag sa mga residente sa maong lugar nga nakadungog nalang sila ug lima ka buto nga ilang gituohan nga usa lamang kini ka pabuto.
Sa inisyal nga imbestigasyon sa kapulisan nga padulong na unta nga isirado sa biktima ang iyang tindahan sa dihang giduolan sa duha ka wala mailhing lalaki og gipusil sa makadaghang higayon ang biktima.
Human sa pagpamusil, misakay dayon ang duha ka suspek sa usa ka itom nga motorsiklo ug paspas nga nagpadagan padulong sa Makar, Barangay Labangal.
Gilayon nga girespondehan sa kapulisan ang insidente ug gidala sa balay tambalanan ang biktima, apan gideklara kini nga dead on arrival.
