Gikatakdang mopadala ang Philippine National Police (PNP) og kapin sa 100,000 ka mga pulis alang sa gipaabot nga pagdagsa sa mga tawo karong semanaha alang sa pagbakasyon sa mga turista atol sa Pasko.
Matud ni Acting PNP Chief PLtGen. Jose Melencio Nartatez Jr. nga ang tumong mao ang pagbantay sa mga terminal, transport hub ug uban pang mga lugar nga gilaumang daghang tawo sa publiko aron mapatuman ang seguridad ug masiguro ang kaluwasan sa mga biyahero nga mopauli karong Pasko ug Bag-ong Tuig.
Gihigpitan usab ang seguridad kon itandi sa miaging tuig diin ang deployment dili moubos sa 60,000.
Gipasabot ni Nartatez nga ang ilang deployment gibase sa kasamtangang sitwasyon sa mga komunidad ug kadalanan sa nasud diin iyang gipasiugda ang mamatikdan nga pagtaas sa gidaghanon sa mga tawo.
Samtang, gipasalig ni Nartatez nga ang ilang mga pulis naka-standby ug andam nga moresponde dili lamang sa mga terminal ug kadalanan apan lakip na usab sa mga lugar nga pangnegosyo ug residensyal nga biyaan sa publiko niining panahona.
Nanawagan usab ang National Police sa publiko nga moapil usab sa pagmintinar sa kahusay ug kaluwasan niining panahona pinaagi sa pagpatuman sa ilang tagsa-tagsa ka mga lakang sa kaluwasan.
