Gikondenar sa Department of Social Welfare and Development (DSWD) ug sa National Council on Disability Affairs (NCDA) ang paghimo sa salida nga “Ngongo,” nga giingong tungod sa paggamit niini og mga pulong nga makapaubos ug mapanghimaraot batok sa mga persons with disabilities (PWDs).
Sumala sa tigpamaba sa DSWD nga si Asst. Sec. Irene Dumlao, ang bisan unsang matang sa diskriminasyon sa media o sa komunidad dili angay itugot.
Nagpahayag usab og kabalaka ang NCDA nga ang titulo ug promosyon sa salida giingong nakalapas sa mga balaod nga nanalipod sa dignidad ug mga katungod sa mga PWD, lakip ang RA 7277, RA 9442, ug ang UN Convention on the Rights of Persons with Disabilities.
Gipasiugda sa NCDA nga ang disability dili angay gamiton isip komedya o kalingawan, ug nga ang media adunay responsibilidad sa pagpasiugda sa hustong representasyon.
Miuyon ang DSWD, nga nag-ingon nga ang mga sayop nga paghulagway nagpalig-on sa negatibo nga mga panan-aw sa katilingban.
Gipasalig sa DSWD ang suporta niini sa NCDA sa pagpasiugda sa respeto, dignidad, ug kagawasan sa sektor sa mga PWD.
Hangtod karon, wala pa’y gipagawas nga pamahayag ang direktor sa pelikula nga si Darry Yap kalabot sa maong isyu.
