GENSAN –Kalambigitan sa ginadili nga droga ang gitan-aw nga anggulo sa motibo sa pagpamusil patay sa usa ka lalaki sa Brgy. Fatima, ning dakbayan, pasado alas-3 sa hapon, kagahapon.
Nailhan ang biktima nga si alyas “Nel” nga nakaangkon og daghang samad pinusilan sa lawas hinungdan sa iyang kamatayon.
Sumala sa report sa kapulisan, duha ka wala mailhing lalaki nga nagsakay og itom nga motorsiklo ang nakaistorya sa biktima apan sa wala madugay, mibunlot og armas ang mga suspk og dayon gipusil sa daghang higayon ang biktima.
Nakuha sa crime scene ang motorsiklo, usa ka gray pitaka nga adunay sachet sa suspected shabu, usa ka cellphone, ug usa ka bala sa armas.
Human sa insidente, mibiya ang mga suspek sa lugar og mipadulong sa main road atubangan sa Airport.
Sa karon, nagkuha pa ang kapulisan og mga CCTV footage aron makahimo og cartographic sketch.
