Gisiguro ni Mayor Lorelie Geronimo Pacquiao nga seryoso na ang lihok ug pagtrabaho sa underpass project sa siyudad human sa daghang panahon nga naatol-atol ug naatras ang maong konstruksyon.
Matud pa sa alkalde, kompirmado nga dili pa gyud mahuman ang proyekto hangtod sa Disyembre 2025, apan iyang gipasalig nga kini magpadayon na sa hapsay ug klarong direksyon.
Dugang pa sa alkalde, dili na siya gusto nga magpabilin nga kataw-anan o lingaw-lingawan sa publiko tungod sa dugay nga pag-abli sa proyekto.
Ang underpass project, nga gilauman nga makatabang sa pagsulbad sa trapiko ug paspas nga pagbiyahe sa mga motorista, usa sa mga gipahimuslan karon sa City Government aron mapaayo ang imprastruktura ug modernisasyon sa General Santos City.
Gipasabot usab sa mayor nga padayon ang iyang pagmonitor sa tanang proyekto sa siyudad aron masiguro nga makahatag kini og tinuod nga benepisyo ug dili lang puro saad alang sa mga Generals.
