GENSAN– Gibutyag ni Jorie Mae Balmediano, tigpamaba sa Office of Civil Defense Region 12, nga mahinungdanon nga kada pamilya adunay andam nga “emergency go bag”.
Importante kini nga butang nga andamon daan sa matag panimalay aron magamit dayon sa panahon sa kalamidad o emerhensiya sama sa linog, baha, bagyo, o sunog.
Ang unod niini naglangkob sa bugas o pagkaon nga dili dali madaut (sama sa mga de-lata, instant noodles, biskwit, ug tubig), Hygiene kit sama sa toothbrush, sabon, sanitary napkin, alcohol, face mask, tissue, ug uban pa, sinena og habol, first aid kit apil niini ang tambal, flashlight ug extra nga baterya, pito aron makapangayo og tabang, og kopya sa importanteng dokumento sama sa birth certificate, ID, titulo, ug uban pa, og kwarta nga magamit sa kalit nga panginahanglan.
Matod ni Balmediano, kung andam ang tanan, mas gamay ang peligro ug mas paspas ang pagbangon human sa katalagman.
Samtang, nagpasalamat si Balmediano sa tanang nitambong ug mipartisipar sa National Simultaneous Earthquake Drill (NSED), diin sa Region 12, ang sentro sa programa ang gipahigayon didto sa Lebak, Sultan Kudarat.
