Gihangyo sa Hamas nga ilakip sa Israel ang mga prominenteng binilanggo lakip sila Marwan Barghouti ug Ahmad Saadat sa listahan sa mga binilanggo nga buhian, isip kabahin sa usa ka kasabutan sa ceasefire nga moresulta usab sa pagpagawas sa mga hostage sa Israel.
Kini nahitabo human ang Israeli Justice Ministry nagpagawas sa usa ka listahan sa 250 ka Palestinian nga mga binilanggo nga buhian, apan wala maglakip sa pito sa mga prominenteng binilanggo.
Sumala sa mga opisyal sa Hamas, ang pag-apil nila Barghouti ug Saadat, nga parehong gisentensiyahan ug life imprisonment tungod sa mga pag-atake nga nakapatay sa mga Israeli, usa ka dakong isyu nga makaapekto sa pag-uswag sa kasamtangan nga kasabutan.
Base sa kasabotan nga gipresenta ni US President Donald Trump, 20 ka Israeli hostages ang gipaabot nga buhian sa dili pa ang udto sa Lunes, Oktubre 13.
Sa samang higayon, ang Israel mopagawas usab sa 250 ka Palestinian nga mga binilanggo ug labaw sa 1,700 ka mga piniriso gikan sa Gaza.
Gisubli sa opisyal sa Palestinian nga ang envoy sa US nga si Steve Witkoff misaad nga hisgutan uban sa Punong Ministro sa Israel nga si Benjamin Netanyahu ang pagpagawas sa mga prominenteng mga binilanggo sa listahan, apan ang Israel ang gikataho nga nagdumili.
Nasayran nga si Barghouti, miyembro sa Fatah, gikonsidera nga pinakasikat nga lider sa mga Palestinian ug posibleng mapildi si Mahmoud Abbas o bisan kinsang lider sa Hamas sa eleksyon.
Samtang, si Saadat, lider sa Popular Front for the Liberation of Palestine (PFLP), gisentensiyahan og 30 ka tuig nga pagkabilanggo tungod sa giingong pagplano sa mga pag-atake sa Israel, lakip ang pagpatay sa usa ka taas nga opisyal sa nasud kaniadtong 2001.
Samtang, ginatos ka mga aid trucks ang gilauman nga moabot kada adlaw para maghatod ug hinabang sa mga sibilyan.
