Niduso ang kampo ni kanhi Presidente Rodrigo Roa Duterte og apela sa International Criminal Court (ICC) human gibasura sa Pre-Trial Chamber I ang ilang hangyo alang sa interim release.
Ang lead counsel ni Duterte nga si Atty. Nicholas Kaufman, mikompirmar nga ilang gisang-at ang apela “usa ka semana ang milabay,” ug gitawag ang desisyon sa korte nga “sayup.”
Sa 23 ka pahina nga desisyon nga gipagawas niadtong Septiyembre 26, ang ICC miinsister nga kinahanglang magpabilin si Duterte sa kustodiya aron malikayan nga maapektuhan ang imbestigasyon ug proceedings.
Gikutlo usab sa korte ang posibilidad nga usa siya ka peligro sa paglupad ug makaapekto sa mga saksi.
Gisalikway sa ICC ang argumento sa depensa nga kinahanglang buhian si Duterte tungod sa iyang pangedaron ug kahimtang sa panglawas, nga nag-ingon nga adunay igong serbisyong medikal sulod sa ICC Detention Center.
Apan matod pa sa kampo sa kanhi presidente, si Duterte dili kuno angayan nga moatubang sa kaso tungod sa pagkunhod sa panghunahuna, apan ang mga huwes niingon nga walay igong ebidensiya nga makapamatuod niini.
Samtang, si Mamayang Liberal Party List Representative Leila de Lima ug pipila ka human rights groups misuporta sa desisyon sa ICC, nga nag-ingon nga kini nagpamatuod lamang nga ang kaso batok sa kanhi presidente adunay igong basehan.
Sa laing bahin, si Bise Presidente Sara Duterte, nagdumili sa pagkomento sa kaso sa iyang amahan, nga nag-ingon nga iyang gitutokan ang mga biktima sa linog sa Davao Oriental.
