Nisumute ang kampo ni kanhi Presidente Rodrigo Duterte og bag-ong medical records ngadto sa International Criminal Court (ICC) nga giingong nagpakita sa iyang “cognitive impairment,” nga matod pa makaapekto sa iyang abilidad sa pag-apil sa husay.
Matod sa lima ka pahina nga dokumento nga gipirmahan ni Atty. Nicholas Kaufman, ang lead counsel ni Duterte, kaniadtong Lunes, ang pagsumite adunay kalabotan sa hangyo sa depensa nga susihon ang legal nga katakus sa kanhi presidente sa wala pa ang pagkumpirma sa pagdungog sa mga kaso.
Giinsistir ni Kaufman nga ang eksaminasyon nagpamatuod nga si Duterte adunay kakulangan sa panghunahuna, nga dugay na nga gidudahan.
Tungod niini, nihangyo ang depensa nga suspensuhon ang bisan unsang legal proceedings hangtod marepaso ang tanang medical records ni Duterte, apil ang Hunyo 23 nga report nga giingong nagsuporta sa findings sa miaging evaluation niadtong Mayo 29.
Una nang gi-postpone sa ICC ang gikatakdang kumpirmasyon sa pagdungog sa mga kaso niadtong Septiyembre 23 human giangkon sa depensa nga “unfit to stand trial” si Duterte ug naglisod sa paghinumdom sa mga detalye, petsa, ug bisan sa mga sakop sa iyang pamilya.
Gisaway ni Bise Presidente Sara Duterte ang ICC tungod sa giingong kakuwang sa pag-atiman sa panglawas sa iyang amahan human sa pipila ka mga insidente diin kini nawad-an sa panimuot.
