GENSAN– Sukad gisugdan niadtong miaging bulan ang crackdown sa mga kolorum nga traysikol apil kadtong walay paigong dokumento, adunay klaro ang pagkunhod sa mga nakasupak sa balaod trapiko.
Matod ni Police Lieutenant Colonel Joel Fuerte, hepe sa Traffic Enforcement Unit (TEU) Gensan, nga ang pinakadakong epekto niini mao ang pagminus sa mga aksidente ug pagkawala sa kinabuhi tungod sa kalambigitan sa vehicular accidents.
Dugang sa nasampit nga opisyal, mas nisang-at ang kahapsay sa kalsada.
Samtang adunay commuters nga nagpadayag nga mas komportable sila karon sa pagsakay.
Base sa datos, kapin na sa 300 ka motorista ang nasikop lakip na ang mga tricycle driver nga walay prangkisa ug nakalapas sa Republic Act 4136, samtang 143 ka drayber ang nadakpan sa unang adlaw pa lang sa operasyon.
Magpadayon ang operasyon sa TEU uban sa local law enforcers samtang gina-engganyo ang mga driver nga magkuha og prangkisa ug kumpletong dokumento sa ilang traysikol.
