GENSAN- Makadawat gihapon si PBGen. Romeo Macapaz Jr. sa iyang binulan nga suweldo, apan dili ang mga bonus, bisan og gipaubos sa preventive suspension sulod sa nubenta ka adlaw.
Matod ni Napolcom executive officer Rafael Vicente Calinisan, si Macapaz ang kasamtangang police director sa Region 12 og nahimong kanhi Criminal Investigation and Detection Group chief.
Ibutang ang nasampit nga opisyal sa PNP Holding Accounting Unit sa Camp Crame tungod sa giatubang nga kaso.
Nag-atubang si Macapaz og reklamong administratibo human nga gikasuhan ni Elakim Patidongan, igsuon sa whistleblower nga si Julie Patidongan.
Giakusahan si Macapaz nga nanghilabot sa mga ebidensiya nga naglambigit sa kaso sa pagdagit ug pagkahanaw sa mga sabungero.
Sa usa ka news briefing, gibutyag ni Calinisan nga ang pagkasuspenso ni Macapaz wala magpasabot nga sad-an ang heneral sa bisan unsang kasaypanan.
Ang suspension gituyo lamang aron dili maimpluwensyahan ni Macapaz ang imbestigasyon sa maong kaso.
