GENSAN- Gibutyag ni Engr. Ronald Nuñeza sa City Engineer’s Office sa General Santos City nga hangtod karon wala gyud pay klaro nga flood mitigation program nga gipatuman sa tibuok nasud.
Matod pa niya, bisan ang Pilipinas mismo naghulat pa sa aksyon ug pundo gikan sa national government aron masulbad ang seryoso nga problema sa pagbaha.
Gibutyag ni Nuñeza, nga limitado lang ang mahimo sa mga city engineers tungod kay kutob ra sila makatrabaho sa lateral o gagmay nga kanal.
Apan kung istoryahan ang dagkong proyekto sama sa diversion channel nga kinahanglan og bilyon-bilyon nga pondo, kinahanglan na gyud ang dakong pondo gikan sa national level.
Dugang pa ni Nuñeza, swerte gihapon ang Gensan kay adunay mga lugar nga mahimo pa nga kapadulngan sa tubig-baha busa dili kaayo dako ang epekto sa mga residente kung mag-ulan og kusog.
Apan nagpasalig siya nga ang City Engineer’s Office padayon nga nagahimo sa tanan nilang makaya aron ma-address ang concern sa publiko bisan pa og limitado lang ang ilang resources.
