Iretiro na sa Chicago Bulls ang numero sa jersey ni kanhi NBA MVP Derrick Rose.
Ang Bulls mipahibalo nga ang retirement honor ipahigayon sa Enero 24, 2026 sa Uniter Center, ang kasamtangang home court sa team sa Chicago, Illinois.
Si Rose nagsul-ob og jersey No. 1 samtang nagdula sa team. Ang uniporme nakahatag og impresyon sa mga fans sa Bulls, ilabi na sa dihang ang 6-foot-3 nga guard ginganlan og NBA MVP sa edad nga 22.
Sa maong pasidungog, si Rose nahimong pinakabata nga magdudula nga nakaangkon ug MVP trophy sa kasaysayan sa NBA.
Nag-average siya og 25 puntos, 4.1 rebounds, ug 7.7 assists matag dula ug nangulo sa Bulls ngadto sa Eastern Conference Finals, nga adunay rekord nga 62-20.
Ang beteranong point guard mao ang No. 1 overall pick sa 2008 NBA Draft. Nahimo dayon siyang bida sa liga ug sa pagsugod na sa NBA season, nakadaog na siya sa Rookie of the Year award.
Si Rose gihinganlan og All-Star sa tulo ka sunod-sunod nga season, tungod sa iyang maayong performance.
Uban sa pagretiro, ang iconic No.1 jersey ni Rose maapil sa mga jersey sa ubang mga legends sa Bulls nga naglakip nila ni Michael Jordan (23), Scottie Pippen (33), Bob Love (10) ug Jerry Sloan (4).
