Nangandam na ang Philippine Army sa pagdeploy ug paghatag og seguridad alang sa umaabot nga Parliamentary Elections sa Oktubre 13 2025.
Kini human nga si PH Army Chief LtGen. Antonio Nafarrete mibisita sa 6th Infantry “Kampilan” Division sa Datu Odin Sinsuat, Maguindanao Del Norte.
Matod niya importante ang tahas sa mga sundalo sa umaabot nga eleksyon sa Bangsamoro Autonomous Region in Muslim Mindanao (BARMM), partikular na sa pagmintinar sa kalinaw ug seguridad.
Kini aron usab malikayan ang mga insidente o hulga nga may kalabotan sa umaabot nga piniliay.
Gawas sa mga sundalo gikan sa 6th Infantry Division, ang PH Army mag-assign usab og mga personnel gikan sa 1st ug 11th Infantry Divisions isip dugang augmentation sa ubang bahin sa Bangsamoro sama sa Basilan, Lanao Del Sur, Maguindanao, Tawi-Tawi ug bisan sa Cotabato City.
Samtang kapin sa 9,731 ka mga opisyal sa Philippine National Police (PNP) ang kasamtangang gipakatap sa rehiyon samtang nagpadayon ang pagpatuman sa gun ban nga nagsugod niadtong Agosto 14 ug ipatuman hangtod Oktubre 28.
Ang National Police nagpatuman usab ug mga checkpoint ug chokepoints isip kabahin sa ilang regular nga mandato aron masiguro ang seguridad ug kahapsay sa nasud.
