Kalit nga nabag-o ang dagan sa kinabuhi sa usa ka homeless ug palahubog nga lalaki sa Brazil, human kini nakadesisyon nga moapil og dagan sa 8km fun run nga giorganisa sa ilahang lokalidad, samtang duna pa kini “hang-over”.
Sumala ni Isaque dos Santos Pinho, wala matud pa siya magdahum nga mag-viral dihang nakadesisyon siya nga moapil sa lumba sa ilahang lugar sa Garrafao do Norte, Brazil.
Pag-angkon niini, nidagan lamang siya arun mahuwasan sa iyahang kahubog. Tungod sa viral niining video, diin makita sa live stream sa maong lumba, naka cargo shorts lamang si Pinho, naka t-shirt, ug naka-tsinelas, apan desidido kining tiwason ang iyahang dagan taman sa finish line, rason nga daghang mga netizens ang nibilib niini.
Taliwala pa man nga nag-una si Pinho sa unang mga minuto sa maong lumba, na-iwit gihapon kini sa katapusan.
Apan tungod sa iyahang ka desidido, gihatagan nalang usab kini og complementary medal sa mga organizers.
Daghang natandog sa estorya ni Pinho, rason nga nagbaha kaniya ang mga ‘running shoes’ ug uban pang kagamitan pang lumba sa dagan.
Karon, nakadesisyon na kini nga undangon na ang paghubog-hubog ug pokusan na lang ang training sa mga umaabot niining marathons.
