Gikumpirma ni Presidente Ferdinand Marcos Jr. nga pirmahan niini ang balaodnon nga nagsugyot nga i-postpone ang 2025 Barangay ug Sangguniang Kabataan Elections (BSKE).
Samtang sa usa ka media forum sa Bengaluru, India, gipangutana siya sa mga tigbalita kung pirmahan ba niya ang balaodnon o pasagdan lang kini ug mahimo dayon nga balaod.
Iyang gipasiugda ang panginahanglan sa pagtutok sa parliamentary elections sa Bangsamoro Autonomous Region in Muslim Mindanao (BARMM) sa Oktubre.
Kini ang unang higayon sa kasaysayan nga adunay ing-ani nga eleksiyon sa BARMM, matod ni Marcos ug kinahanglang dili kini mapakyas tungod kay adunay epekto kini sa proseso sa kalinaw.
Matod sa Presidente, bag-o lang natapos ang dagkong eleksiyon, ang 2025 midterm national ug local elections sa Mayo, ug bisan ang Commission on Elections (Comelec) nipahibalo na nga dili nila makaya kini.
Sa sayo pa, gipahibalo ni Comelec chairperson George Erwin Garcia ang Malacañang nga karong Martes, Agosto 12, ang pagpirma sa balaudnon alang sa pag-postpone sa BSKE.
Ang eleksyon gikatakda unta sa Disyembre 1, 2025.
Kaniadtong Hunyo, giaprobahan sa Kongreso ang bicameral conference committee report nga nagsugyot nga lugwayan ang termino sa katungdanan sa barangay ug SK officials sulod sa upat ka tuig, ug i-postpone ang eleksyon ug ibalhin kini sa unang Lunes sa Nobyembre 2026.
