Gianunsiyo ni US Attorney General Pam Bondi kaniadtong Huwebes nga gipataas sa Estados Unidos ang reward money alang sa impormasyon nga makatudlo sa pag-aresto kay Venezuelan President Nicolas Maduro, ngadto sa $50 milyon, tungod sa iyang giingong pagkalambigit sa drug trafficking ug pakigkunsabo sa mga kriminal nga grupo.
Sa usa ka video sa X, giakusahan ni Bondi si Maduro nga nakigtambayayong sa mga iladong mga sindikato sama sa Tren de Aragua ug Sinaloa Cartel.
Gitawag ni Venezuelan Foreign Minister Yvan Gil ang maong lakang nga “the most ridiculous smokescreen ever seen.” Sa usa ka post sa Telegram, giingon ni Gil nga bahin lang kini sa usa ka “media circus” sa Estados Unidos aron malipay ang oposisyon sa Venezuela.
Una nang gitakda ang reward nga $15 milyon sukad kaniadtong 2020, dihang giakusahan sa US prosecutors si Maduro sa drug trafficking.
Nadugangan kini sa $25 milyon kaniadtong Enero 2025 sa dihang nanumpa si Maduro sa ikatulo nga termino, kauban ang mga bag-ong sanctions batok sa mga opisyal sa gobyerno.
Kaniadtong Pebrero, gideklara sa foreign terrorist organization sa U.S. State Department ang Tren de Aragua, dungan sa MS-13 ug pipila ka Mexican cartels ug kamiadtong Hulyo, gidugang usab sa listahan sa global terrorist organizations ang Cartel de Los Soles.
Sumala kay U.S. Secretary of State Marco Rubio, si Maduro giingong lider sa Cartel de los Soles sulod sa kapin sa usa ka dekada – usa ka grupo nga nalambigit sa pagpayuhot og droga ngadto sa Estados Unidos.
