Gisaad ni Mayor Lorelie Pacquiao ang iyang pagsalig ug kumpiyansa sa liderato ni Police Colonel Nicomedes Olaivar Jr. sa pagpanguna sa General Santos City Police Office (GSCPO), nga matapos na ang iyang tour of duty karong umaabot nga Agosto 11, 2025.
Sumala sa alkalde, kampante siya sa mga nilihukan ug performance ni Col. Olaivar, ilabi na sa pagmintinar sa kalinaw ug kahusay sa dakbayan atol sa iyang pagpamuno sa kapulisan.
Tungod sa maayong dagan sa iyang pagpangulo, giplano na karon sa lokal nga panggamhanan ang paghangyo nga malugwayan pa og unom ka bulan ang termino ni Col. Olaivar isip hepe sa GSCPO.
Ang maong plano gitun-an na karon sa mayor uban sa mga opisyal sa LGU ug sa PNP, aron formal nga maendorso sa regional headquarters ang proposal sa extension.
Sa pagkakaron, nagpadayon ang mga lakang sa lokal nga PNP alang sa hapsay nga transisyon – kon dili man madayon ang extension, andam na ang ilang rekomendasyon sa posibleng mopuli nga opisyal.
