GENSAN– Bisan pa napamub-an ang ‘reciprocal tariff’ nga ipahamtang sa US sa Pilipinas sa mga produkto niini, apan dehado sa gihapon ang nasud sa maong kasabotan tali ni Pang. Ferdinand Marcos Jr. ug US President Donald Trump.
Matud pa ni Atty. Rey Cartojano nga sa karon gikan sa 20% nga taripa nahimo na lamang nga 19% ang ipahamtang ni Trump sa mga produkto nga ipasulod sa Amerika.
Samtang ang mga produkto sa US nga ipasulod diri sa Pilipinas ang dili na pahamtangan og buwis kung diin pabor kini sa US.
Apan sa pagtan-aw ni Atty. Cartojano nga adunay sirkumstansya, nga adunay mga kasabutan tali sa maong duha ka nasud nga wala nabutang sa papel ilabina ang ‘commitment’ ni Trump para sa Pilipinas.
Sa pamahayag sa nasampit nga abogado nga ang pagpahamtang og taripa ni Trump tungod sa nasinatian nga deficit.
Samtang nagtuo kini nga dili kaayo dako og epekto ang 19% nga taripa sa mga exporters ingon man sa ekonomiya sa katibuk-an sa nasod.
