GENSAN – Gideklarang walay klase karong adlawa, Hulyo 21, sa tanang lebel sa pampubliko ug pribadong eskwelahan sa Dakbayan sa General Santos subay sa selebrasyon sa 11th Blaan Day.
Ang Blaan Day usa ka lokal nga holiday nga gitakda aron hatagan ug pagpasidungog ang kultura, tradisyon, ug kontribusyon sa Blaan nga tribu — usa sa mga lumad nga grupo nga unang nagpuyo sa rehiyon.
Pinaagi sa usa ka executive order nga gipagawas sa lokal nga kagamhanan, gilauman nga ang pag-obserba sa maong adlaw makatabang sa pagpalig-on sa identidad ug panaghiusa sa mga lumulupyo, ilabi na sa mga kabatan-onang Blaan.
Gi-awhag usab ang publiko nga mohimamat ug motambong sa mga aktibidad nga giandam sa lokal nga cultural affairs office sama sa mga tradisyonal nga sayaw, pasundayag, ug exhibit sa mga produkto ug sinina sa Blaan.
Ang selebrasyon sa Blaan Day nagapadayon matag tuig isip simbolo sa pag-ila sa kaimportante sa kultura ug katungod sa mga lumad sa sulod sa dakbayan ug tibuok rehiyon.
