Giklaro sa Department of Justice nga posible pa nga ipadayon ang ‘conviction’ sa mga suspek sa kaso sa mga missing nga sabungero bisan pa man kung wala nay makaplagan nga patayng lawas sa mga biktima.
Matod ni Justice Assistant Secretary ug Spokesperson Atty. Mico Clavano, mahimong mahitabo kini tungod kay matod niya subay kini sa balaod.
Kini bisan pa man nga nagpahigayon og ‘initial diving operation’ ang DOJ sa pakigtambayayong sa Philippine National Police – Crime Investigation and Detection Group ug Philippine Coast Guard.
Gipasabot niini nga ang usa ka indibiduwal nga sad-an mahimo gihapon nga makonbikto pinaagi sa ubang paagi nga makapamatuod o makahatag og gibug-aton sa krimen nga nahitabo.
Siya miingon nga ang paggamit sa mga litrato ug mga video mahimong gamiton sa pagdumili ug pagpakita sa kamatayon nga tinuod.
Dugang pa ni Spokesperson Clavano nga malambigit kini sa prinsipyo sa ‘corpus delicti’ sa murder nga mitumbok sa substance sa mismong krimen.
Apan kung adunay makit-an ang mga awtoridad nga nahabilin, magsilbi lamang kini nga dugang nga ebidensya sa krimen.
Kahinumduman nga karong bag-o, gibutyag sa saksi nga si Julie ‘Dondon’ Patidongan nga giingong gilubong ang mga nawala nga sabungero sa usa ka bahin sa Taal Lake.
