Gipagawas sa Commission on Elections (COMELEC) ang ‘Entry of Judgment’ ug ‘Certificate of Finality’ nga opisyal nga nagproklamar kang Bienvinido “Benny” Abante sa City Board of Canvassers (CBOC) isip kongresista sa 6th district sa Manila.
Matod ni COMELEC Chairman George Erwin Garcia, kini ang kompirmasyon sa poll body sa ilang desisyon niadtong Hunyo 30 sa pagbawi sa proklamasyon ni Joey Chua Uy tungod sa pagkansela sa iyang Certificate of Candidacy (CoC) human napamatud-an nga dili siya natural-born citizen.
Busa, gideklara karon sa poll body nga si Abante ang midaog nga kongresista sa 6th district sa Manila.
Bisan og dunay kamandoan ‘for immediate proclamation’ sa dokumento nga gipagawas sa komisyon, giklaro ni Garcia nga ang desisyon kon mag-convene ba sila karong adlawa aron iproklamar si Abante anaa gihapon sa City Board of Canvassers (CBOC).
Matod niya nga ang City Board of Canvassers (CBOC), nga gilangkuban sa City Election Officer sa Distrito, City Prosecutor of Manila ug City Superintendent sa Department of Education (DepEd), usa ka independent body gikan sa COMELEC mao nga ila kining gitugotan nga molihok sa maong sitwasyon.
