Nagkadako ang posibilidad nga kapin sa 14 milyon ka tawo ang mamatay sa pag-abot sa tuig 2030 tungod sa pagbuwag sa administrasyon ni kanhi US President Donald Trump sa US Agency for International Development (USAID).
Kini base sa usa ka pagtuon nga gipatik sa iladong Lancet medical journal, nga gidungan sa pagtigom sa mga business leader alang sa usa ka UN conference sa Spain karong semanaha, nga nagtumong nga palig-onon ang nangaluya nga aid sector.
Nasuta sa maong pagtuon nga usa ka ikatulo sa giingong ihap o kapin sa 4.5 milyon ka bata nga lima ka tuig ang panuigon paubos ang mamahimong mamatay sa 2030 — katumbas sa 700,000 ka bata matag tuig.
Sa usa ka pahayag, giingon ni Davide Rasella, co-author sa Lancet report, nga para sa mga low ug middle-income countries, ang epekto sa pagkabungkag sa US aid agency maihisama sa global pandemic o dakong armed conflict.
Gipadayag usab niya nga mawagtang ug malungtad ang duha ka dekadang kalambuan sa kahimsog sa mga kabus ug delikadong populasyon tungod sa pagkawala sa maong pondo.
Base sa datos nga gikolekta sa 133 ka mga nasod, gitantiya sa grupo sa mga researchers nga 91 milyong pagkamatay ang napugngan sa mga umuunlad nga nasod gikan 2001 hangtod 2021 pinaagi sa suporta sa USAID.
Kahinumduman nga kaniadto, giingon ni US Secretary of State Marco Rubio nga labaw 80% sa tanang programa sa USAID ang gikansela sa administrasyon ni Pres. Trump.
