Dili “bloodbath” apan usa ka “bubble bath” ang gisumite nga Answer Ad Cautelam ni Vice President Sara Duterte isip tubag sa mga alegasyon sa impeachment case batok kaniya. Kini ang gibutyag sa House Prosecution Panel, subay sa pamahayag ni House Impeachment Spokesperson Atty. Antonio Audie Bucoy.
Matud pa ni Bucoy, imbes nga atubangon ang seryoso nga mga alegasyon, mas gipunting sa kampo ni Duterte ang pagpugong nga dili madayon ang impeachment trial, pinaagi sa mga procedural objections ug mga teknikalidad sama sa forum-shopping ug jurisdictional issues.
Ang prosekusyon ang pormal nga gisumite sa ilang Reply batok sa Answer Ad Cautelam ni Duterte.
Gibutyag ni Bucoy nga kini naglangkob og daghang “misconceptions, falsehoods, ug general denials” nga wala makahatag og klarong tubag sa mga alegasyon.
Gipasabot ni Bucoy nga ubos sa balaod, ang general denial nga walay klarong eksplenasyon mahimong ituring nga pag-ako o admission sa sakdal.
Usa sa mga seryosong isyu nga wala gitubag sa depensa mao ang P125 milyon nga confidential funds nga nagasto sulod lamang sa 11 ka adlaw, nga gi-flag sa Commission on Audit (CoA) base sa audit findings.
Gidugang pa ni Bucoy nga wala usab gitubag ni Duterte ang alegasyon nga naningkamot kini nga hadlangan ang CoA sa pagpagawas sa ilang audit reports, lakip na ang daw pwersa sa CoA nga dili isapubliko ang ubang dokumento.
Gisaway usab ni Bucoy ang depensa ni Duterte sa ilang taktika sa pagbalhin sa diskusyon, imbis nga moatubang sa pangunahing isyu sa kaso.
Bisan pa man sa mga pamahayag ni Duterte nga gihagit ang mga nag-akusa kaniya nga ipadayon ang trial, apan lahi ang gipakita sa legal team sa bise presidente.
