Gikabalak-an sa Department of Education (DepEd) ang paggawas sa mga peke nga announcement gamit ang social media.
Naglakip kini sa mga peke nga announcement bahin sa cash assistance, class suspension, scholarship program, ug no-backpack policy.
Una nang naabot sa DepEd ang maong impormasyon nga gikabalak-an sa departamento tungod sa posibleng epekto niini sa mga tinun-an ug mga ginikanan nga mahimong mailad sa mga peke nga anunsyo.
Gumikan niini, nipagawas og pasidaan ang DepEd ug gipahinumdoman ang publiko nga dili lang motuo sa mga anunsyo nga mogawas sa social media.
Matod sa ahensya, ang tanang opisyal nga anunsyo ug impormasyon kalabot sa basic education ipagawas lang sa DepEd Philippines, ang opisyal nga social media page sa DepEd.
Makompirmar usab sa mga magtutudlo o management sa eskwelahan kung sakto ba ang impormasyon nga nabasa sa social media.
Sa wala pa magsugod ang klase karong buwana, unang nitumaw ang peke nga anunsyo nga idugang ang Grade 13 sa Senior High School. Gihimakak dayon kini sa departamento.
