Gipahibalo sa Department of Health (DOH) nga wala pa matala sa Pilipinas ang kaso sa COVID-19 variant nga NB.1.8.1 o mas nailhan nga Nimbus variant, nga hinungdan sa pagsaka sa mga kaso sa Amerika ug pipila ka mga nasod sa Southeast Asia.
Bisan pa niini, gibutyag ni Health Spokesperson Albert Domingo nga padayon ang pagkuha ug ‘sequence’ sa mga sample sa virus aron matino kung anaa ba ang presensya sa mga variants.
Apan sa pagkakaron, wala pa matala sa nasod ang maong variant nga kasamtangang gi-monitor sa World Health Organization (WHO).
Matod sa DOH official, ang Nimbus variant kaliwat sa Omicron variant, ug nagdala kini ug kasakit sa tutunlan nga gisaysay nga matod pa sama sa kasakit sa razor blade.
Ang mga sintomas kung matakdan sa maong variant pareho ra sa ubang variants sa COVID-19 sama sa kasakit sa tutunlan, hilanat, ug barado nga ilong – apan wala kini nagdala ug grabeng mga sintomas.
Sa laing bahin, giingon usab nga protektado gihapon ang mga nabakunahan batok sa mga bag-ong variants tungod kay aktibo gihapon ang gitawag nga T-cell mediated immunity.
