Moabot sa 86 ka mga biktima ang personal nga miadto sa buhatan sa Presidential Anti-Organized Crime Commission (PAOCC) karong adlawa , Sabado aron mopasaka og mga reklamo batok sa abusadong online lending applications (OLA).
Sumala sa PAOCC, ang mga biktima nagreklamo sa mga iligal nga taktika sa mga OLA lakip na ang pagpakaulaw sa publiko, doxing, pinugos nga pagmemensahe, ug mga hulga, nga giingon nga dayag nga paglapas sa pagkapribado sa datos, regulasyon sa pagpahulam, ug dignidad sa tawo.
Gipaniguro sa ahensya nga tubagon niini ang mga gisang-at nga reklamo ug ipadayon ang paggukod sa mga abusadong online lending operators.
Kini nga lakang kabahin sa gipakusog nga kampanya sa PAOCC, sa pakigtambayayong sa Philippine National Police-Criminal Investigation and Detection Group (PNP-CIDG), PNP-Anti-Cybercrime Group (PNP-ACG), Securities and Exchange Commission (SEC), ug National Privacy Commission (NPC).
Matud ni PAOCC Usec. Gilberto Cruz nga aduna nay 150 ka pormal nga reklamo ang buhatan sa pagkakaron, ug gilauman nga modaghan pa ang maong ihap samtang mogawas ang mga biktima.
