Taliwala sa nagkasamot nga tensyon tali sa Israel ug Iran, gisugyot pag-usab sa pipila ka mga magbabalaod ug energy experts ang paghimo og Strategic Petroleum Reserve (SPR) sa Pilipinas aron maandam ang nasud batok sa posibleng krisis sa suplay ug presyo sa lana.
Matod ni Senator Sherwin Gatchalian, kanhing chairperson sa Senate Energy Committee, dugay na unta nga angay nga magtigom sa nasod og kaugalingong reserba sa lana, labi pa nga pirme nga apektado ang Pilipinas sa mga kalibutang kalihukan sa merkado sa lana.
Ang Strategic Petroleum Reserve (SPR) usa ka dagkong imbakan sa krudo o mga processed petroleum products nga magamit sa panahon sa emerhensya sama sa giyera, natural nga kalamidad, o kalit nga pagsaka sa presyo. Daghang mga nasud sama sa Estados Unidos, Japan, ug South Korea ang adunay ingon niini.
Sa pagkakaron, misaka na usab ang presyo sa lana tungod sa missile exchange ug airstrikes nga nagpadayon tali sa Israel ug Iran.
Apektado usab ang suplay nga moagi sa Strait of Hormuz, usa sa pinakaimportanteng agianan sa lana sa kalibutan.
Tungod niini, gilauman nga mosaka usab ang presyo sa gasolina, diesel, ug LPG sa Pilipinas sa umaabot nga mga semana kung magpadayon pa ang gubot.
