Gikumpirma sa Office of the Ombudsman nga gipaabot pa nila ang pormal nga tubag sa kampo ni Vice President Sara Duterte kalabot sa mga isyu nga may kalabotan sa paggasto sa confidential funds sa iyang mga opisina.
Matod sa tigpamaba sa Ombudsman, hangtod karon wala pa nagpadala og official reply ang kampo ni VP Sara sa ilang preliminary request for clarification nga gipadala niadtong milabay nga buwan, nga nagtumong sa paggamit sa multimillion-peso confidential and intelligence funds (CIF) nga gi-allocate sa Office of the Vice President (OVP) ug Department of Education (DepEd) sa tuig 2022 ug 2023.
Ang pag-review sa Ombudsman nasentro sa mga isyu nga gipagawas sa Commission on Audit (COA), lakip na ang dali nga pag-exhaust sa P125 million nga confidential fund sulod lang sa 11 ka adlaw, base sa audit reports.
Nagpangayo og dugang kasayuran ang Ombudsman kabahin sa angay ba sa mandato sa DepEd ug OVP ang paggamit sa CIF, unsang mga proyekto o intelligence operations ang gitumbok sa pondo, og kinsa ang responsable sa approval ug disbursement sa maong pondo.
Matod sa Ombudsman, ilang ginasiguro nga ginasunod ang due process ug dili sila magdali sa paghukom hangtod makompleto ang tanang dokumento ug pahayag gikan sa kampo ni VP Sara.
Sa mga miaging pahayag, giangkon ni VP Sara nga wala siyay gibuhat nga sayop ug ang tanang paggasto sa CIF kay ligal ug ubos sa pamaagi nga gitugot sa balaod.
