Nanawagan ang Palasyo sa Malacañang sa Senado nga tumanon ang panawagan sa business community nga paspasan ang impeachment trial ni VP Sara Duterte aron mamintinar ang kalig-on sa ekonomiya ug pagsalig sa mga investor sa pagpamuhunan sa atong nasud.
Matod ni Palace Press Officer USec. Claire Castro, naalarma na ang mga naa sa sektor sa negosyo tungod sa pagkalangay sa impeachment trial, busa angayan nga molihok ang Senado.
Matud pa ni Castro nga dili ganahan ang mga investor nga mamuhunan sa nasud kon ang usa ka lider mapasanginlan og kurapsyon ug daw gipaboran sa pipila ka senator-judges.
Gipanghimakak usab ni Castro ang pamahayag ni VP Sara nga nahugno ang ekonomiya sa Pilipinas.
Gihatagan og gibug-aton ni Castro nga nag-uswag na karon ang ekonomiya sa nasud.
Dakong tabang niini ang pagkatangtang sa Pilipinas sa gray list sa Financial Action Task Force nga nakahatag ug taas nga pagsalig sa mga mamumuhunan.
Gikutlo usab ni Castro ang taho sa Asian Development Bank (ADB) nga ang Pilipinas nagmintinar sa maayo kaayong panglantaw sa ekonomiya alang sa tuig 2025.
Ang pamahayag ni Castro maoy tubag sa pamahayag ni House Impeachment Spokesperson Atty. Antonio Audie Bucoy nga mahimong maapektuhan ang kumpiyansa sa mga investor kung magdugay ang proseso sa impeachment ni Bise Presidente Sara Duterte.
Samtang, girespeto sa Malacañang ang panawagan sa business community nga paspasan ang impeachment trial ni VP Sara.
Hinuon gisubli ni Usec Castro nga dili manghilabot si Presidente Marcos sa proseso sa impeachment sa Senado.
Gusto ni Presidente Marcos nga sundon sa Senado ang Konstitusyon ug ang lagda sa balaod bahin sa impeachment.
