Gitataw ni Vice President Sara Duterte nga dili angay pugson ang mga Senador nga mokanaog sa katungdanan isip mga huwes sa iyang impeachment trial base lang sa ilang political bias.
Sa press conference sa Davao City, gibutyag ni VP Duterte nga kon ang basehan sa inhibition mao ang iyang mga kaalyado, angay usab nga pugngan ang mga Senador nga matud pa niya dayag nga mosupak kaniya, sama ni Senador Risa Hontiveros.
Sa laing bahin, gibutyag ni San Juan Rep. Ysabel ”Belle” Zamora, usa sa mga House prosecutor nga ang pag-recus o pag-inhibit kinahanglang boluntaryo gikan sa mga Senador, ilabi na kung adunay partiality.
Siya miingon nga dili pa sigurado kung ang Kamara mohangyo sa pag-inhibit sa pipila ka mga Senador, apan abli sila sa kapilian kung kini makatabang sa hapsay nga pag-uswag sa trial.
Gidayeg usab ni Zamora ang mga Senador sama ni Hontiveros nga misupak sa pagbalik sa Articles of Impeachment ngadto sa Kamara, niingon nga dili kini tungod kay supak kini ni Duterte kondili pagsunod sa proseso sa Konstitusyon ug Senado.
Kahinumduman nga giaprobahan sa Kamara ang impeachment batok kang Duterte niadtong Pebrero 5, 2025 ug kasamtangang pending ang kaso sa Senado human kini nakakuha og boto nga 18-5 nga ibalik una ang Articles of Impeachment ngadto sa Kamara nga wala kini hingpit nga gibasura.
