Nakadawat og hulga sa bomba ang Zamboanga International Airport niadtong Sabado, Hunyo 14, matod sa Civil Aviation Authority of the Philippines (CAAP).
Usa ka cabin crew gikatahong nakakita og “may bomba” nga mensahe sa usa ka rolyo sa toilet paper sulod sa lavatory sa Cebu Pacific flight 5J851 gikan sa Manila, nga gi-report dayon sa mga security personnel.
Gisusi sa aviation security unit ang eroplano ug gideklarar nga luwas kini sa bisan unsang pabuto alas 8:58 sa buntag ug nabalik sa normal ang mga operasyon sa tugpahanan.
Subling gipahinumdoman sa CAAP ang publiko nga ang pagbiaybiay o pagpakatap sa bakak nga impormasyon bahin sa mga bomba usa ka seryoso nga hulga sa seguridad ug adunay bug-at nga silot ubos sa Presidential Decree No. 1727.
