Ang bugtong naluwas sa pagkahagsa sa eroplano sa India niasoy kung giunsa niya milagrosong nakalingkawas gikan sa pagkaguba sa ayroplano.
Sa usa ka interbyu sa lokal nga media sa India, ang 40-anyos nga British national nga si Vishwash Kumar Ramesh, nga karon nagpaayo sa ospital, nahinumdom nga sa pagbuka niya sa iyang mga mata, nakita niya ang mga pasahero ug flight attendant nga nagbuy-od nga patay.
Nakagawas kuno siya pinaagi sa kusog nga pag-abli sa naguba nga emergency exit door nga partially open duol sa iyang gilingkoran sa seat 11A sa Air India Boeing 787 Dreamliner.
Giklaro usab niya nga wala siya moambak tungod kay naa na sa yuta ang eroplano apan nigawas sa emergency exit.
Matod niya nga dili kaayo dako ang sunog sa bahin sa gilingkoran nga eroplano dihang niigo kini sa yuta, apan sa iyang pagkanaog sa eroplano hingpit kining nibuto.
Si Ramesh nakaangkon og samad paso sa iyang walang bukton.
Nahinumduman usab ni Ramesh nga dali kaayong nahitabo ang insidente nga 30 segundos pa lang sa pag-take off sa erroplano, adunay kusog nga saba ug nahagsa ang eroplano.
Si Ramesh pabalik sa United Kingdom uban sa iyang igsoon sa dihang nahitabo ang trahedya.
Ikasubo, ang iyang igsuon usa sa 241 ka mga pasahero ug tripulante nga namatay sa insidente.
Samtang, sumala ni Dr. Rajnish Patel, ang head sa operasyon sa Ahmedabad Civil Hospital diin gidala ang naluwas sa pagkahagsa sa eroplano, dili kritikal ang kahimtang ni Ramesh ug mahimo siyang ma-discharge sa umaabot nga mga adlaw.
