JAPAN- Nasuko ang Japan sa makuyaw nga pagmaniobra sa usa ka fighter jet sa China nga hapit naigo sa eroplano niini sa Pacific Ocean.
Matod pa ni Chief Cabinet Secretary Yoshimasa Hayashi nga ang J-15 Chinese warplane gikan sa Shandong aircraft carrier milupad 45 metros duol sa Japanese P-3C maritime surveillance plane sa Japan.
Ang P-3C aircraft ang panag-iya sa Maritime Self-Defense Force sa Japan nga nakabase sa isla sa Okinawa.
Naghimo lang sila og surveillance sa international waters sa Pacific sa dihang ang mga eroplanong iggugubat sa China mihimo sa makuyaw nga lakang.
Matod niya nga dili kini ang unang higayon nga ang China mihimo og aksyon batok kanila tungod kay niadtong Sabado, ang Chinese J-15 warplanes gikan sa Shandong migukod sa ilang Japanese P-3C patrol aircraft sulod sa dul-an 40 minutos.
Ang gobyerno sa Japan nipasalig nga ilang huptan ang maayong komunikasyon sa China sa bisan unsang lebel ug padayon nilang bantayan ang kahanginan nga sakop sa Japan.
