Nisumite ang International Criminal Court (ICC) sa ilang ikapitong hugpong sa mga ebidensiya batok kang kanhi Presidente Rodrigo Duterte kalabot sa kasong crime against humanity tungod sa giingong duguong kampanya sa ‘war on drugs’.
Nasayran nga niadtong Mayo 30, ang prosekusyon misumiter og dugang 129 ka butang, dugang sa 267 ka ebidensiya nga gisumite sukad nagsugod ang disclosure period niadtong Abril 30.
Matod ni ICC Prosecutor Karim Khan, nga temporaryo nga nagbakasyon samtang giimbestigahan tungod sa giingong sayop nga binuhatan, ang kinatibuk-ang gidaghanon sa mga dokumento sa ilang relativity database anaa sa 130,000 nga kinahanglan nga susihon sa dili pa hingpit nga ibutyag.
Ang prosekusyon adunay hangtod Hulyo 1 aron isumite ang tanan nga ebidensya nga magamit sa pagdungog nga gikatakda sa Setyembre 23.
Si Duterte gidakop niadtong Marso 11 sa usa ka international warrant for crimes against humanity.
Sumala sa mga grupo sa tawhanong katungod, kapin sa 30,000 ka mga tawo ang napatay ubos sa iyang kampanya batok sa droga.
Sa laing bahin, si Duterte kasamtangang gitanggong sa ICC headquarters sa The Hague, Netherlands.
Kahinumduman nga niadtong Mayo, gibasura sa ICC ang hangyo sa kampo ni Duterte nga i-disqualify ang duha ka huwes sa ICC nga nagdumala sa iyang kaso.
