Giangkon ni Davao City Mayor Sebastian “Baste” Duterte nga siya apektado sa kahuyang ug pagpayat sa iyang amahan nga si kanhi Presidente Rodrigo Roa Duterte, human nila magkita sa The Hague, Netherlands.
Samtang anaa pa siya sa Netherlands, gibutyag ni Mayor Baste nga wala siya’y nakit-ang rason nga kasohan ang iyang amahan, ug nagtuo siya nga makagawas ra kini sa kadugayan tungod kay wala usab rason nga ipabilin kini sa detention facility sa International Criminal Court (ICC).
Gidugang pa sa batan-ong Duterte nga wala pay klaro nga desisyon kung paunsa pormal nga manumpa ang amahan niya isip bag-ong napiling mayor sa Davao City, apan giingon niyang gilihok na nila kini karon.
Sa pagkakaron, nakadetine ang kanhing presidente sa The Hague, Netherlands, samtang nagahulat pa sa pinal nga konpirmasyon sa mga akusasyon batok kaniya nga crimes against humanity, may kalabutan sa giingong mga extrajudicial killings atol sa maduguong war on drugs sa iyang administrasyon.
Sa laing bahin, murag walay gana o bugnaw ang tubag ni Mayor Baste sa isyu nga gusto ni Senador Imee Marcos nga paulion si Duterte pabalik sa Pilipinas.
Matod ni Mayor Baste, nga dili na siya ganahan sa mga Marcos, ug kung si Senador Imee man, casual friend ra matod pa niya kini, apan dili sa natad sa politika.
Iyang gipanghimakak ang mga report nga dad-on ni Sen. Imee Marcos pabalik sa Pilipinas ang iyang amahan, kay nakapauli na kini sa nasud human siya dili tugutan sa ICC nga mabisita ang kanhi Pangulo tungod kay dili man siya suod nga paryente o legal counsel.
