Gikatakdang mubisita sa Pilipinas si Singapore Prime Minister Lawrence Wong alang sa duha ka adlaw nga opisyal nga pagbisita sa Hunyo 4 ug 5.
Ang pagbisita ni Wong sa nasud gipahibalo sa Presidential Communications Office (PCO) isip tubag sa imbitasyon nga gihatag kaniya ni Presidente Ferdinand Marcos Jr.
Kini ang unang pagbisita ni Wong sa Pilipinas ug gipaabot nga adunay bilateral meeting tali sa duha ka mga lider aron mas mapalig-on pa ang relasyon, ilabina sa natad sa panglawas, climate change, ug kooperasyon sa serbisyo publiko.
Si Marcos ug Wong gilauman usab nga magbayloay og mga panglantaw sa politikal ug ekonomikanhong mga isyu nga importante sa rehiyon.
Ang Singapore mao ang ika-8 nga pinakadako nga trading partner sa Pilipinas niadtong 2024 ug sa pagkakaron gipuy-an sa gibanabana nga 22,000 ka mga Filipino.
Katapusang mibisita sa Pilipinas ang Prime Minister sa Singapore niadtong 2017.
