Mosusi ang Department of Information and Communications Technology (DICT) sa Dito Telecommunications human sa taho nga 400 ka Chinese nationals ang nag-overstay sa ilang trabaho sa kompanya.
Ang Dito gipanag-iya ni Duterte crony Dennis Uy, diin ang mga Intsik nagkupot og posisyon sa kompanya bisan nag-overstay na sila sa Pilipinas, gigamit lang kuno og tourist visa.
Matod ni DICT Assistant Secretary Renato Paraiso, ang ahensya mohimo og pormal nga imbestigasyon, sa pakigtambayayong sa Cybercrime Investigation and Coordinating Center (CICC).
Makig-alayon usab ang DICT sa Bureau of Immigration (BI) aron matubag ang isyu sa visa.
Apil usab sa imbestigasyon ang National Telecommunications Commission (NTC) ug uban pang ahensya ubos sa DICT, diin motutok sa pagsusi kon ang mga langyaw nag-abuso ba sa imprastraktura ug sistema sa ICT sa Dito.
