Gipahibalo sa Vatican nga ang lubong ni Pope Francis ipahigayon sa Sabado, Abril 26, alas 10 sa buntag sa St. St. Peter’s Basilica.
Kahinumduman nga nitaliwan si Pope Francis niadtong Lunes sa edad nga 88, human na-stroke ug giatake sa kasingkasing.
Samtang, nagtagbo ang mga cardinal kagahapon, aron pangandaman ang pagpili sa bag-ong Santo Papa sulod sa tulo ka semana.
Ang Argentina, diin gikan ang Santo Papa, mideklara og usa ka semana sa nasudnong pagbangotan, sama sa India, nga mideklara og tulo ka adlaw sa nasudnong pagbangotan.
Gipaabot ang mga lider sa nagkalain-laing nasod ug sakop sa harianong pamilya sa lubong ni Pope Francis sa St. St. Peter’s Basilica. Una nga gipahibalo ni US President Donald Trump nga motambong siya .
Sumala sa mga lagda sa Simbahang Katoliko, ang lubong ni Pope Francis mahitabo tali sa Biyernes ug Domingo, tulo ngadto sa unom ka adlaw human sa iyang kamatayon.
Ang lawas sa Santo Papa ibalhin gikan sa Santa Marta chapel ngadto sa St. Peter’s Basilica karong adlawa, aron mahatagan og kahigayonan ang mga deboto sa paghatag sa ilang respeto.
Ang iyang kataposang testamento nag-ingon nga siya ilubong sa Santa Maria Maggiore basilica sa Roma, usa ka makasaysayanong panghitabo kay usa ra ka Santo Papa ang gilubong gawas sa Vatican.
Si Pope Francis, o sa tinuod nga kinabuhi nga si Jorge Bergoglio, nahimong unang Latin American Pope ug ang unang Heswita nga nahimong lider sa Simbahang Katoliko.
Sulod sa 12 ka tuig sa iyang papado, nahimo siyang manlalaban alang sa mga kabus, migrante, ug sa kinaiyahan.
Nailhan usab siya sa iyang mga paningkamot sa pagreporma sa pagdumala sa Vatican ug sa iyang pagtutok sa mga isyu sa hustisya sa katilingban ug mga biktima sa sekswal nga pag-abuso sulod sa simbahan.
