Gituldukan na ni Ruben Enaje, lokal sa San Fernando, Pampanga ang iyang debosyon ug tradisyon nga pagpalansang sa krus matag Semana Santa.
Kung asa gibutyag niini ang iyang pagretiro human ang ginahimo nga ika-36 ka higayon niya nga paghupot sa papel isip Hesus sa reenactment sa pagpakasakit sa Ginoo.
Human sa kapin tulo ka dekada nga debosyon, niingon siya nga dili na niya kaya nga ilansang siya pag-usab tungod sa kasakit nga iyang gibati.
Matod niya nga nakasinati siya og pag-init sa mga samad sa iyang kamot, nga gipasabot ni Ruben nga wala mahitabo kaniadto.
Usa pa sa iyang mga pasangil mao nga gibati niya ang pagkalipong samtang nagdala sa papel isip si Jesus sa dalan sa wala pa ang iyang gikatakda nga paglansang sa krus.
Apan bisan pa niini, malampuson gihapon niyang nakompleto ang ika-36 nga higayon sa pagpalansang sa krus, nga maoy iyang tradisyon ug debosyon sulod sa katuigan.
Busa, sa iyang pagretiro, si Arnold Maniago, kinsa kapin na usab sa duha ka dekada, maoy mopuli sa naandan niyang tradisyon.
Bisan sa kainit sa adlaw, ang reenactment sa Pasyon sa Ginoo gitambongan gihapon sa mga 6,000 ngadto sa 8,000 ka mga turista nga partikular nga miadto sa Barangay San Pedro Cutud sa San Fernando, Pampanga.
