Patay ang tulo ka mga pulis human nagbangga ang usa ka motorsiklo ug trak sa Lanao del Norte.
Ang aksidente nahitabo sa national highway sa Purok 2 sa Barangay Pigcarangan sa lungsod sa Tubod mga ala 1:50 sa kaadlawon niadtong Abril 18.
Matod sa Police Regional Office 10, tulo ka mga polis gikan sa Barangay Poblacion, Tubod ang sakay sa motorsiklo dihang nabangga ang usa ka trak nga gikargahan og mga muwebles paingon sa Pagadian City.
Ang insidente niresulta sa grabeng pagkaangol sa lawas sa drayber sa motorsiklo ug sa iyang duha ka backriders.
Gidala pa sa Baroy Provincial Hospital ang mga biktima apan gideklarar nga dead on arrival.
Usa sa mga biktima mao ang 29-anyos nga pulis nga nadistino sa Lanao Del Norte Provincial Office 2nd Provincial Mobile Force Company.
Samtang ang usa 31-anyos nga pulis nga nadistino sa lungsod sa Tagoloan, Misamis Oriental ug ang ikatulong polis nadestino sa Tubod police.
