Gitangtang sa Malacañang ang duha ka opisyal sa Department of Health (DOH), lakip ang usa ka assistant secretary ug usa ka direktor.
Base sa notice of termination nga giluwatan sa buhatan ni Executive Secretary Lucas Bersamin, si DOH Assistant Secretary Ariel I. Valencia ug Director IV James B. Bernadas gitangtang sa ilang puwesto nga epektibo dayon.
Hinuon, ang sulat ni Executive Secretary Bersamin ngadto kang Health Secretary Teodoro Herbosa wala maghisgot sa rason sa pag-undang sa serbisyo sa duha ka opisyal.
Gimanduan ang opisyal sa pagsiguro sa hapsay nga turnover sa mga dokumento ug impormasyon gikan sa mga buhatan sa Valencia ug Bernadas aron masiguro nga hapsay ug padayon ang paghatag sa serbisyo ngadto sa publiko.
Ang sulat nga gipetsahan Abril 15, 2025 gipirmahan ni Secretary Bersamin. Sa text message ni Palace Press Officer Atty. Claire Castro, matod niya prerogative sa appointing authority ang pagdesisyon kung kanus-a gusto nga tapuson ang termino sa gitudlo nga opisyal niini.
Dugang ni Castro nga ang DOH padayon nga nakig-alayon sa Office of the President alang sa mga detalye sa kalihukan sa mga kawani, subay sa direktiba ni Presidente Ferdinand Marcos Jr. nga gipaagi sa buhatan ni Secretary Bersamin.
