Gipangunahan sa Philippine Sports Commission (PSC) ang re-meeting sa mga sakop sa Inter-agency Task Force nga unang natukod aron pagplano sa hapsay nga pag-host sa Pilipinas sa 2025 International Volleyball Federation (FIVB).
Ang nasangpit nga TF gilangkuban sa 20 ka mga representante gikan sa gobyerno ug pribadong ahensya nga gipangulohan ni PSC chairman Richard Bachmann ug Philippine National Volleyball Federation president Ramon “Tats” Suzara.
Matod ni Suzara, nagpabiling hapsay ang tanang pagpangandam ug nagsunod sa timeline nga gilatid sa grupo.
Gipasalig ni Bachman ang hingpit nga suporta sa gobyerno aron makab-ot ang usa ka ‘world-class’ nga kalihokan.
Lakip sa gipangplantsa mao ang sektor sa transportasyon alang sa mga contingent ug bisita gikan sa lain-laing nasod, komunikasyon, ug ang epekto niini sa turismo.
Ang international sporting event gitakda sa Septiyembre 12 hangtod Septiyembre 28 diin ang National Capital Region (NCR) maoy magsilbi nga main venue.
Lakip sa mga ahensya nga nalambigit sa dakong pagpangandam mao ang Metropolitan Manila Development Authority, Department of Tourism, National Intelligence Coordinating Committee, mga lokal nga kagamhanan, ug uban pa.
